 |
| سميرة موسي عالمة الذرة المصرية |
من هي سميرة موسى .
سميرة موسى بنت مصرية اتولدت يوم 3 مارس سنة 1927 . في قرية اسمها سيمبو التابعة لمركز زفتا في محافظة الغربية. ابوها كان مهتم جدا انه يعلمها كويس من صغرها لدرجة انها حفظت اجزاء كاملة من القرآن الكريم مكانتش بتسيب جورنال غير لما تقرأ كل صفحاته.
سميرة كانت هوايتها قراءة الجرايد او اي كتاب يقع قدامها ولو صدفة. فلما حس والدها ان قدرات بنته الزهنية اعلى من زمايلها قرر انه يهتم بها وبتعليمها اكتر شوية. حس ان ممكن يبقى لها مستقبل مختلف عن كل اللي حواليها.
فخد بنته وطلع على القاهرة. وكان راجل مرتاح ماديا لدرجة انه لما سافر القاهرة اشترى فندق كامل في منطقة الحسين كنوع من الاستثمار. وبما ان منطقة الحسين منطقة سياحية فلك ان تتخيل الفندق كان تمنه كم وقتها.
سميرة موسى دخلت مدرسة قصر الشوق الابتدائية. وبعدها مدرسة بنات الاشراف الثانوية. والمدرسة دي اللي اسستها نبوية موسى واحدة من رائدات التعليم في مصر.
خلال ايام الدراسة كانت شطارة سميرة موسى وزكاءها مسمعين جدا لدرجة انها الفت كتاب عن الجبر الحديث. تخيل طالبة في الثانوي تألف كتاب كامل عن الجبر. في حين ان كتير من الطلاب مش فاهمين اصلا كتاب الجبر بتاع المدرسة .
نبويا موسى لما سمعت ان سميرة موسى بتفكر بس مجرد تفكير انها تتنقل لمدرسة حكومية لان المدارس الحكومية هي اللي بيتوفر فيها معامل للعلوم قررت نبوية موسى انها تشتري معمل جديد للمدرسة. علشان بس سميرة موسى تفضل موجودة في مدرسة بنات الاشراف الثانوية.
الحكومة المصرية كانت بتدي منح مادية فلوس يعني للمدرسة اللي بيطلع منها الاول على الجمهورية. وفعلا سميرة ما تخيبش ظن نبوية موسى وتطلع الاولى على الجمهورية سنة 1936م. وتفوز مدرستها بالمنحة المالية.
قصة سميرة موسى كاملة وعلاقتها بالدكتور مصطفي مشرفة .
تدخل سميرة موسي كلية العلوم بجامعة القاهرة. وهناك تقابل الدكتور مصطفى مشرفة اللي لسة لحد النهاردة فيه اختلاف ما بين اذا كان تم اغتياله او انه مات بشكل عادي .
الدكتور مصطفى مشرفة كان أستاذ سميرة موسى في كلية العلوم. وكان منبهر جدا بذكائها وتفوقها الدراسي. سميرة ما خيبتش ظن استاذها وتطلع الاولى على الدفعة.
لكن ترفض الجامعة انها تتعين معيدة. لان كان لسه في عقول مستكترة ان بنت مصرية تبقى دكتورة جامعة. لكن الدكتور مصطفى مشرفة دخل باستقالته لرئيس الجامعة. وقال له يا تديها حقها في التعيين يا اما توافق على استقالتي دلوقتي.
وطبعا رئيس الجامعة ما كانش ينفع يضحي بواحد زي الدكتور مصطفى مشرفة. اولا عميد كلية العلوم. ثانيا ملقب اينشتاين العرب. ثالثا البرت اينشتاين نفسه كان بيتابع ابحاثه في مجال الطاقة الذرية. لدرجة انه وصفه بانه واحد من افضل علماء الفيزياء وبالتالي واحد زي ده كنز ما ينفعش يقبل استقالته. ووافق رئيس الجامعة على تعيين سميرة موسى معيدة في الكلية.
عالمة الذرة سميرة موسى من أبحاث واختراعات .
عملت ابحاث في التواصل الحراري للغازات. وسافرت في بعثة لبريطانيا علشان تدرس الاشعاع النووي وخدت الدكتوراه في الاشعة السينية. الاشعة السينية دي اللي بتعملها على جسمك لو لا قدر الله عندك مشكلة فالدكتور يطلب منك اشعة علشان يحدد المرض بالتحديد.
أسست هيئة الطاقة الذرية وده كان بعد التلات شهور بس من تأسيس دولة اسرائيل سنة 1948م. وده توقيت مهم جدا لازم يلفت انتباهك لان في الوقت ده انت عندك دولة لسه بتقف على رجليها. كل جيرانها من الدول العربية اعداء. وبالتالي لازم تأمن نفسها.
وافضل وسيلة للدفاع هي الهجوم. وانك تفقد عدوك اي فرصة للتفوق عليك ايا كان نوع التفوق. تفوق عسكري تفوق علمي تفوق رياضي اي تفوق.
وفاة سميرة موسى وتفاصيل عملية اغتيالها علي يد الموساد .
يوم 15 اغسطس سنة 1952م نفس السنة اللي قامت فيها ثورة يوليو 1952م في مصر كانت عالمة الذرة المصرية سميرة موسى في طريقها علشان تزور معامل نووية في ولاية كاليفورنيا في امريكا. مين اللي وجه لها الدعوة علشان تزور المعامل دي ؟ ايه المعامل النووية نفسها ؟
وفعلا راحت مع السائق اللي بعتته المعامل النووية يوصلها لحد هناك بعربية مخصوص. لكن اللي حصل انه هم في طريقهم للمعامل النووية تقابلهم عربية نقل كبيرة. تخبط عربيتهم وتموت عالمة الذرة المصرية سميرة موسى في نفس اللحظة .
لكن السواق اللي سايق العربية ينط من العربية قبل الحادثة بمسافة كافية سمحت له ما يتأزيش. طيب السواق ازاي عرف ان فيه حادثة هتحصل علشان ينط من العربية. وكانت ايه اقواله في التحقيقات عن الحادثة دي ؟
اقول لك للاسف السواق ده بمجرد ما نط من العربية ما حدش عرف عنه حاجة اختفى للابد ولما سأله عن السواق ده اتضح انه كان منتحل اسم واحد ما لوش وجود اصلا. وحتى لما سألوا المعامل النووية الامريكية عن الدعوة اللي وجهوها لسميرة موسى كانت المفاجأة.
ان المعامل النواوية الامريكية ما وجهتش اي دعوات لسميرة موسى علشان تزورها. ولا كانت تعرف ان سميرة موسى في طريقها للمعامل اصلا.
مين اللي بعت لعالمة الذرة المصرية سميرة موسى ؟ دعوة لزيارة المعامل النووية فولاية كاليفورنيا. ومين السواق اللي خدها بالعربية من سكنها واختفى فين بعد ما نط من العربية قبل ما تخبط في العربية النقل. ومين اللي كان عاوز يخلص من سميرة موسى ؟
أهم انجازات سميرة موسى
في نفس الوقت كانت سميرة موسى خلصت مجموعة ابحاث في بريطانيا. الابحاث دي قدرت تخرج منها بمعادلة عن تفتيت المعادن الرخيصة زي النحاس. وتصنيع قنبلة ذرية من المعادن الرخيصة دي.
عاوزك تتخيل معي ان مصر في الخمسينات كان فيها عالمة ذرة اسمها سميرة موسى وصلت لمعادلة تمكنها من صناعة قنبلة ذرية بمعادن رخيصة. تفتكر انت لو سميرة موسى كانت وصلت المعادلة دي للسلطات المصرية.
السلطات المصرية اللي هي وقتها كانوا الظباط الاحرار. وبعد كده جمال عبدالناصر. تفتكر لو الرئيس جمال عبدالناصر كان امتلك القنبلة الذرية. كان هيعمل بيها ايه ؟ طيب مين اللي من مصلحته ان سميرة موسى تختفي ؟
هي ابحاث سميرة موسى والمعادلة اللي وصلت لها. فين ؟ ما حدش يعرف. لان اللي حصل ان بعد ما سميرة موسى خلصت دراستها في بريطانيا. خدت منحة لدراسة الذرة بجامعة كاليفورنيا في امريكا.
وهناك وصلت لنتايج مهمة جدا في مجال ابحاث الذرة. فكانت النتيجة ان امريكا سمحت لها تزور المعامل الذرية هناك. وده معناه ان سميرة موسى هي المصرية الوحيدة اللي حازت على الفرصة دي. هي المصرية الوحيدة اللي زارت المعامل الذرية الامريكية.
اغتيال سميرة موسى .
وبعد ما ده حصل امريكا عرضت على سميرة موسى انها تكمل حياتها في امريكا مقابل عروض كتير من بينها الجنسية الامريكية. لكن تفاجئ سميرة موسى الكل وترفض كل العروض دي. وتقرر هترجع مصر.
لكن غلطت غلطة واحدة بعتت لوالدها جواب تقول له فيه انها قدرت تزور المعامل الذرية في امريكا. وانها بمجرد ما ترجع مصر هتقدم لبلدها كل اللي تعرفه وعرفته.
لو انت جهاز امني وعرفت ان فيه عالمة قدرت توصل لمعادلة تصنيع القنبلة الذرية من معادن رخيصة. وانها زارت المعامل الذرية الامريكية. وانها قررت تنقل كل ده لمصر. انت هتعمل ايه ؟ لو انت جهاز امني هتعمل ايه ؟ هتمنعها ازاي ؟ اهو ده اللي حصل.
جالها تليفون دكتورة سميرة مساء الخير. احنا المعامل النووية الامريكية. احنا يشرفنا ان عالمة مهمة زيك تزورنا وتطلع على احدث التقنيات اللي وصلنا لها في التكنولوجيا النووية.
وطبعا ده كان طعم ممتاز جدا لواحدة من نوعية سميرة موسى. كل اهتمامها منصب على التكنولوجيا النووية والذرية. تحقق كل يوم نجاح علمي اقوى من اللي قبله. وفرصة كبيرة علشان تجمع معلومات اكتر واهم عن التكنولوجيا النووية قبل ما تنزل مصر.
خلاص دي بتجهز نفسها علشان ترجع مصر وتفتح معمل خاص بها في محافظة الجيزة. زي ما ذكرت لوالدها في الجواب اللي بعتته له. وهتبدأ شغل علشان تصنع لبلدها مصر القنبلة الذرية وتبقى بين الدول العظمي .
وفعلا ييجي يوم 15 اغسطس سنة 1952م . وتتحرك سميرة موسى مع السواق. او اللي كان مفهمها انه السواق اللي بعتته المعامل النووية. ويسوق العربية وعنده نقطة محددة ينط من العربية. قبل ما عربية نقل تخلص عربية سميرة موسى وهي جواها. وتقابل وجه كريم في نفس اللحظة.
الفنانة راقية ابراهيم وعلاقتها بــ سميرة موسى .
لكن بعد اكتر من 50 سنة تتنشر في الجرايد معلومة بان ممثلة مصرية من اصول يهودية هي اللي ساعدت الموساد في اغتيال سميرة موسى. طيب ازاي بتقول نفس المعلومة انها كانت صاحبة سميرة موسى وبتنقل تحركاتها. والاخطر من كده انها طلعت نسخة على مفتاح غرفة سميرة موسى في امريكا. وسلمته للموساد الاسرائيلي علشان يدخل الغرفة ويسرق كل الابحاث والمعلومات الخاصة بسميرة موسى.
لكن هنا روايتين عكس بعض تماما. هعرفكم عليهم علشان تفكر فيهم وتحكم بنفسك. اذا كانت الممثلة المصرية دي متورطة فعلا في اغتيال سميرة موسى ولا لأ ؟
الحكاية بدأت لما تلاث صحفيين وباحثين بدأوا يدوروا ورا الاتهامات اللي اتوجهت للفنانة راقية ابراهيم. واللي اسمها الحقيقي رشيل ابراهام ليبي. بانها ساعدت الموساد في اغتيال سميرة موسى.
الصحفيين والباحثين هم اسامة الشاذلي ووسيم عفيفي وريم الشاذلي. قالوا ايه بقى ؟ قالوا الاتهام اللي اتوجه للفنانة راقية ابراهيم بدأ بعد ثورة 25 يناير. وتحديدا مع ترشح السيد عمرو موسى لرئاسة مصر.
حضرتك تقول لي وايه علاقة الفنانة راقية ابراهيم بالسيد عمرو موسى ؟ اقول لك ما الخبر اللي اتنشر ان راقية ابراهيم تبقى ام عمرو موسى. وبالتالي تبقى امه يهودية. زي ما قلنا من شوية ان الفنانة راقيه مصرية من اصول يهودية.
تم الترويج للمعلومة دي سنة 2012م في موقع اخباري اسمه المصريون. وده موقع محسوب على التيار الاسلامي. واتنشرت المعلومة في صيغة حوار مع حفيدة الفنانة راقية ابراهيم نفسها. وانها قالت الحفيدة المفروض ان هي بتدور في مقتنيات جدتها راقية ابراهيم لقتها كاتبة ورقة من بين ورق كتير بانها كانت عميلة للموساد وان هي اللي ساعدته في اغتيال عالمة الذرة المصرية سميرة موسى.
التلات باحثين اللي ذكرتهم لحضرتك لما دوروا على حفيدة الفنانة راقية ابراهيم ما حدش فيهم قدر يلاقي لها صورة ولا عنوان ولا اي دليل يثبت انها موجودة اصلا. واتصلوا بالموقع الاخباري علشان يسألوا على الصحفي اللي عمل الحوار واللي كان اسمه حسين البربري.
وكانت المفاجأة ان الموقع الاخباري نفسه ما يعرفش حاجة عن صحفي اسمه حسين البربري. ما يعرفش عنه حاجة غير انه بيراسل الموقع من الخارج. لكن ما يعرفش عنوانه ولا حتى تليفونه.
ففضل فريق البحث يدور على صحفي بنفس الاسم. لحد ما لقى صحفي اسمه مسعد حسين عبدالله البربري. و نفى علاقته بالحوار الصحفي مع حفيدة الفنانة راقية ابراهيم. وقال انه مجرد تشابه اسماء. بينه وبين الصحفي اللي اجرى الحوار يعني.
وبالتالي هنا يظل السؤال قائم مين الصحفي اللي عمل الحوار؟ وفين حفيدة الفنانة راقية ابراهيم اللي اتهمت جدتها بانها شغالة مع الموساد. علما بان الاتهام ده ما ظهرش غير بعد اكتر من 60 سنة على وفاة سميرة موسى. ظهر بس خلال انتخابات الرئاسة في مصر علشان يتقال ان راقية ابراهيم الفنانة اليهودية تبقى ام عمرو موسى مرشح الرئاسة.
وهنا سؤال هو فعلا راقية ابراهيم تبقى ام عمرو موسى تعال نجاوب. عمرو موسى نفسه نشر بيان يوم 5 ابريل سنة 2012م نفى فيه ان تكون له علاقة بالفنانة راقية ابراهيم.
لكن الغريب هنا ان الاشاعة دي زاد انتشارها والترويج لها في نفس الاسبوع اللي خرج فيه الشيخ حازم ابو اسماعيل من انتخابات الرئاسة بسبب جنسية والدته الامريكية. لكن عموما يعني السيد عمرو موسى مش موضوعنا دلوقتي. احنا سؤالنا هل راقية ابراهيم متورطة في اغتيال سميرة موسى ولا لأ ؟
اتقال ان راقية ابراهيم كانت بتكره مصر والعرب كلهم. طيب ازاي ؟ اتقال ان راقية ابراهيم لما حضرت مهرجان كان السينمائي مع الوفد المصري سنة 1947م وده كان اول مهرجان يتنظم بعد الحرب العالمية التانية انها دخلت على منظمين الحفل وقالت لهم ان هي اللي تستحق تكون رئيسة الوفد المصري. لكن مصر حرمتها من الحق ده مجرد انها من اصول يهودية.
فما كان من ادارة المهرجان الا انها تجاهلت رئيس الوفد المصري. وتعاملت مع راقية ابراهيم باعتبارها رئيس الوفد المصري. واتقال ان الموقف ده كان سبب في ان صناع السينما المصرية يتجاهلوها ويتجنبوها.
ودا مش حقيقي لان لما تراجع عدد الافلام اللي قامت بطولتها بعد الموقف ده . ده اذا كان حصل فعلا هتلاقي الكلام مش منطقي راقية ابراهيم قدمت بطولة قدمت 6 افلام كاملين في مصر بعد مهرجان كان ده منهم فيلم اسمه كت اهدم بيتي مع محسن فرحان ومحمود المليجي وسميحة ايوب وفيلم جنون الحب مع انور وجدي وعماد حمدي فبنمشي يبقي ازاي صناع السينما في مصر تجاهلوها وقدمت 6 افلام .
حفيدة راقية ابراهيم اللي ما حدش يعرف عنها حاجة او اذا كانت حقيقية ولا لأ. اتقال على لسانها ان جدتها راقية ابراهيم هي اللي كانت بتاخد سميرة موسى تعشيها برة سكنها علشان تدي فرصة لعملاء الموساد. هم. انهم يدخلوا اوضتها يفتشوها براحتهم.
في حين ان راقية سنة 1952م اللي هي نفس سنة اغتيال سميرة موسى كانت في القاهرة. وما سافرتش برة مصر غير مرتين.
الاولى في يونيو 1952م لما سافرت المانيا علشان تحضر مهرجان برلين السينمائي. والمرة التانية سافرت امريكا في ديسمبر. يعني بعد اغتيال سميرة موسى باربع شهور.
الموقف اللافت في حياة راقية ابراهيم واللي ناس كتير بتدور عليه معلومة انها كانت بتحب اسرائيل على حساب مصر والعرب. انها لما اتعرض عليها فيلم هتقوم فيه بدور بنت فلسطينية بتقاوم اسرائيل. رفضت وعملت بداله فيلم تاني قامت فيه بدور بنت انجليزية اهلها ماتوا على ايد الجيش الالماني. لكن برضو في نفس الفيلم ده دفعت راقية ابراهيم عن المرأة المصرية والعربية بشكل عام.
موقف مصر من اغتيال سميرة موسى .
وهنا انا عرضت حضرتك الروايتين رواية اتهامها ورواية تبرئتها. فكر واحكم بنفسك. لكن الاهم اننا نرجع للدولة المصرية في الوقت ده. كان موقفها ايه من اغتيال عالمة الذرة سميرة موسى. ايه الموقف اللي خدته مصر علشان ترجع حقها والسؤال الاهم ليه ما تمش تأمين سميرة موسى هي وغيرها علماء المهمين في الوقت ده. واللي برضو تم اغتيالهم.
سميرة موسى تم اغتيالها قبل اسبوعين بس من ثورة يوليو 1952م. يعني النظام الملكي الحاكم في مصر كان مشغول بتنظيم الظباط الاحرار اللي عاملين قلق في الجيش. والظباط الاحرار هم نفسهم مشغولين بالتخطيط لعزل الملك فاروق. بالبلدي كده ما كانش حد فاضي لحد. وطبعا المستفيد من اي دوشة او عدم استقرار في بلدك هو عدوك.
وفضلت مصر مشغولة بالملك والظباط الاحرار لدرجة ان اغتيال سميرة موسى ما اتنشرش في الجرايد المصرية غير بعد خمس ايام من وفاتها. خمس ايام كاملين الشعب المصري ما كانش يعرف ان عالمة الذرة سميرة موسى اللي ابهرت بريطانيا وامريكا والعالم تم اغتيالها. واتسرقت ابحاثها والمعلومات اللي وصلت لها خلال دراستها.
الشعب المصري في وقتها ما كانش لسه يعرف انه من خمس ايام فاتوا اتحرم من امتلاك القنبلة الذرية. اللي كانت ممكن تغير مستقبل مصر والمنطقة العربية كلها.
تكريم مصر لسميرة موسى .
فضلت سميرة موسى منسية لحد ما تولى الرئيس السادات حكم مصر. منحها وسامي العلوم والفنون من الطبقة الاولى سنة 1981م واطلق اسمها على مدرسة في قريتها.
لكن كل التكريمات دي كانت بعد ما خسرنا سميرة موسى اللي كانت بتحلم ان بلدها تبقى بقوة عظمي . اللي كانت بتحلم تعالج السرطان بالذرة وتبقى علاج سهل ورخيص ومتاح لكل الناس. زيها زي الاسبرين.