عملية السبت الحزين رد على عنجهية إسرائيل وبطولة البطل خليفة متري ميخائيل واسر بطل السباحة الإسرائيلي

أبطال معركة كمين السبت الحزين

كمين السبت الحزين بعد حرب النكسة في جريمتين عملهم العدو الصهيوني في العمق المدني المصري. ضرب مصنع أبوزعبل ومذبحة بحر البقر. كانت فترة عربدة الإسرائيليين جوة مصر وبطبيعتنا كمصريين معروف عننا ما نسيبش حقنا.

أثناء الاستنزاف بعد اللي حصل في بحر البقر أثارت حالة من الغضب والأستياء عند القيادة السياسية والعسكرية وعشان كده كان القرار حاسم وصارم زي ما مصر حزنت كلها لازم عملية رد لاسرائيل تحزن فيها كلها ودا سبب كافي لاتخاذ قرار كمين السبت الحزين .

سبب عملية كمين السبت الحزين .

وكانت التكليف للجيش التاني والجيش التالت.انهم ينفذوا عملية كمين السبت الحزيم وكل جيش فيهم يختار مجموعة تشارك في العملية.
وبالفعل تم اختيار مجموعتين مكونة من أفراد. الأولى من الصاعقة من الكتيبة 83 بقيادة ملازم محمد التميمي والملازم عبدالحميد خليفة والتانية المشاة من اللواء 135 بقيادة النقيب شعبان حلاوة. وبعد اختيار المجموعتين اجتمع بيهم اللواء عبدالمنعم خليل قائد الجيش التاني. لشرح لهم طبعا طبيعة العملية.

رد عليهم اللوا عبدالمنعم خليل وقال بعد ما تضربوا ضربتكم مش عايزكم ترجعوا وايديكم فاضية. لازم ترجعوا على الاقل معكم اسير او اتنين. عشان نفضحهم وتبقى فضيحتهم قدام العالم كله. 

راحوا على مدرسة الصاعقة في بورسعيد عشان يبدأوا التدريبات. والتدريبات كانت على محاور تدريبات قتالية وتدريبات لرفع اللياقة البدنية وتدريبات على تنفيذ العملية نفسها .

بعدها ب أيام تم تحديد يوم 30 مايو1970م لتنفيذ العملية. التاريخ ده ما كانش كده وخلاص. ده كان لعدة اسباب.

أولاً حسب نتايج الاستطلاع كان يوم الاجازات. يعني المجموعات اللي موجودة في الخدمة نازلين اجازة. وفي نفس الوقت اللي موجودين في الاجازة راجعين الخدمة. وهم نازلين اجازات كانوا بيمشوا في اكتر من طريق. وكانت مهمة العملية انهم يعملوا لكمين في واحد من الطرق اللي بيمشوا منها.

ثانياً كان كلها اسبوع وهيعملوا هناك احتفالات بانتصارات حرب النكسة . اللي هي بالنسبة لنا احنا اسمها مكنتش حرب كانت نكسة يونيو وبدايه الاستنزاف . وعشان كده كان القرار اننا لازم ننكد عليهم. ويوم الانتصارات بالنسبة لهم نخليه يوم اسود على دماغهم.

تفاصيل عملية كمين السبت الحزين .

قبل تنفيذ العملية بيوم .جماعة استطلاع راحت تعمل الاستطلاع الاخير. عشان تشوف هل في اي مستجدات حصلت ولا الوضع على ما هو عليه . فلقوا كل حاجة زي ما هي.

يوم عملية وبعد منتصف الليل عدت المجموعتين في القوارب المطاطية للبر التاني من شط قناة السويس وبعد ما الرجالة عدوا البر التاني القوارب المطاطية دي كانت مربوطة بحبال وماسكينها رجالتنا على الجانب المصري وسحبوها وهي فاضية عشان ما تفضلش موجودة هناك. والعدو يكتشف وجودها. وبالتالي هيكتشف ان في ابطال من رجالتنا بينفذوا عملية. لان العملية ما كانتش هتاخد ساعة ولا اتنين. العملية هتطول.

وكانت الاوامر صادرة لافراد العملية. انه بعد ما تخلصوا التنفيذ هترجعوا سباحة. وكانت خطة العملية مكونة كالتالي انهم هيعملوا عدد اتنين كمين. الأولى كمين صاعقة في موقع شمال مدينة القنطرة. وكمين مشاة في موقع جنوب رأس العش. عشان يبقى كمين هنا وكمين هنا. بحيث ان اي هدف يعدي في النص يتم اصطياده و العودة بأسير.

كل كمين وصل مكانه حفر حفره. عملوا التمويه اللازم. لحد ما تيجي معلومات من الاستطلاع رجالتنا الابطال الفدائيين من اهلنا بدو سينا يبلغوهم بان الدورية بتاعت الخنازير على وصول. الساعة عشرة صباحا جات لهم معلومة من الاستطلاع ان في كول إسرائيلي مكون من اربع دبابات واربع مدرعات جايين من القنطرة رايحين رأس العش

صدرت الاوامر للكمين الاولاني انه ما يتعاملش معهم يسبوهم يعدوا وميبادرش بالهجوم لحد ما يوصلوا للكمين التاني. وبالتالي هيبقوا بين فكي الكماشة. الكمين التاني هيتعامل معهم. لو حد منهم هرب او تراجع للخلف يطلع الاولاني ويخلص على الباقي منهم. 

وده اللي حصل فعليا. وتم فتح النيران والقضاء على القول الاسرائيلي بالكامل.لم يتبقى منه الا شاويش واحد من المظلات هرب من مدرعة . وده كان اول اسير ياخدوه من مدرعة للعدو .

تدمير مجموعة اللواء الجولاني مظلات بالكامل .

كانوا عارفين وواثقين ان لسه في رزق تاني جاي وخير اكتر جاي عشان كده ما رضيوش يرجعوا. نزلوا الحفر مرة تانية. واستنوا الخير اللي جاي. عشان يطلعوا يعملوا الكمين التاني .طبعا اليهود ما سكتوش. نظموا مجموعات تانية في منتهى الشراسة. اسمها مجموعة اللواء الجولاني مظلات.

ودي مجموعة بيطلق عليها اللقطاء. عبارة عن جماعة مرتزقة اسرائيل من كل دول العالم. ودربوهم تدريبات شرسة ودموية. لا عندهم دين ولا ملة ولا مبدأ ولا عقيدة في حياتهم. الا الدم والفلوس. وما زالوا موجودين لحد النهاردة في الجيش الصهيوني. وتم منحهم الجنسية الاسرائيلية. ومجموعة اللواء الجولاني كانوا بيركبوا مدرعات ومجنزرات ليها شكل معين.

جماعة الاستطلاع بتاعتنا اللي هما الرجالة السيناوية بلغوا ابطال العملية ان اللي داخلين عليكم راكبين مدرعات شكلها مميز. المعلومة وصلت للبطل عبدالحميد .

لما عرف ان اللي داخلين عليهم دول اللواء الجولاني قال دول باعتين البهاريز والتقايل بتاعتهم. والله ما يرجع واحد منهم حي.
راح عامل لهم فخ مدمر عشان يقضي عليهم بالكامل. 

الفخ عبارة عن مثلث مساحته واحد كيلو متر. اطرافه اجناب المثلث عبارة عن ست دانات. و بيربط ما بين الست دانات فتيل متفتجر عشان لما دانا واحدة منهم تنفجر فالفتيل المتفجر يوصل بالست دانات فينفجروا كلهم دفعة واحدة وبالتالي كل اللي موجود جوة المثلث الموجة الانفجارية تبيدهم تماما .

اللواء الجولاني وصلوا الساعة سبعة مساء اليوم ده كان يوم شديد الحرارة. كانوا جايين قالعين الجواكت بتاعتهم. جايين بقى عادي جدا قال لك هنخلص على شوية المصريين دول ونرجع.

ويا دوب وصلوا الفخ من هنا وتم التدمير بالكامل. الناحية التانية كمان المشاة شاف تلات مدرعات جايين بسرعة رايحين يلحقوا زمايلهم اللي بيدمروا واصطادوهم رجالة الكمين.

وكانت الضربة الاولى من الرقيب يوسف عبدالله. ضرب اول قزيفة ار بي جي عليهم على المدرعة الاولى. ولكن القزيفة جلت او طاشت منه. عشان كده خرج من الحفرة جري مسافة ميت متر لحد ما بقى قدام المدرعة وش في وش. مش مهم يعيش ولا يموت؟ اهم حاجة عنده انه ينفذ المطلوب منه.

اسر الرقيب الإسرائيلي يئير دوري تسيفي .

وبالفعل ضرب القذيفة التانية عليهم اصابت المدرعة الاولى بعد اصابة المدرعة الاولى طلعوا رجالتنا من الحفر تعاملوا مع المدرعتين التانيين خلصوا على اللي فيهم بالكامل ما عدا واحد بس منهم هو نط من المدرعة وحاول انه يهرب. ولكن رجالتنا اسروه. طلع اسمه الرقيب يئير دوري تسيفي. وده كان بطل في السباحة وفرد من افراد القوات الخاصة الاسرائيلية.

وبعد ما خلصوا وصدرت الاوامر من قائد العملية بالاخلاء الفوري قبل ما يوصل اي دعم تاني. وبالفعل اخلو المكان فورا وخدوا المسافة جري لحد الضفة شط القناة. وشايلين الاسرى على اكتافهم.

بطولة الرقيب خليفة متري ميخائيل في كمين السبت الحزين .

واول ما وصلوا شط القناة الاسير اللي اسمه يائير دوري سيفي حاول انه يهرب. ولكن لحقه البطل الرقيب خليفة متري ميخائيل لدرجة ان دار بينهم اشتباك واقتتال ولكن طبعا على مين البطل خليفة متري روقه الترويقة الصح وشاله على كتفه ووصل به لحد شط القناة. وكمل به سباحة للجانب المصري البطل محمد التميمي .

نتائج عملية كمين السبت الحزين .

وكانت العودة رجالتنا بفضل الله سالمين غانمين. ما فيش اي خسائر الا بطل واحد منهم بس اللي كان عنده اصابة في الفخذ الايمن ورجعوا و أسر اتنين.

الاتنين اسرى دول فضلوا مسجونين عندنا هنا في مصر لحد بعد حرب تلاتة وسبعين. وتم تبادلهم في صفقة التبادل الاسرى ما بينهم وبين عدد من الاسرى المصريين عندهم.

وكانت خسائر اللإسرائيليين بالنسبة لهم وحسب ما هم اللي قالوا في كمين السبت الحزين مقتل 35 واصابة حوالي 200 ده غير تدمير عدد من الدبابات والمدرعات وتاني يوم العملية تم استقبال الابطال بمركز القيادة وتكريمهم وعلى فكرة كان الرئيس جمال عبدالناصر بيتابع سير العملية لحظة بلحظة وقيل ان الرئيس عبدالناصر بعد العملية دي بانت على وشه معالم الفرحة وابتسم لاول مرة من بعد سبعة وستين وفترة الاستنزاف

اما بالنسبة للخنازير فكان يوم كمين السبت الحزين بالفعل يوم اسود على دماغهم. تاني يوم اللي هو الحد خرج الشباب الاسرائيلي في مظاهرة ضد الحكومة الاسرائيلية. فخرجت بعدها جولدا مائير. قالت لهم واسرائيل بها السبت الحزين. يعني هم بنفسهم اللي اطلقوا على اليوم ده السبت الحزين. 

لانه كان بالفعل يوم اسود وحزين على دماغهم. وده كان درس قاسي لهم. وابلغ رد عليهم بعد المجزرة اللي ارتكبوها في بحر البقر . عشان يعرفوا مين هو الشعب المصري ومين هو الجندي المصري.

البطل خليفة متري ميخائيل

اللواء عبدالحميد خليفه

اللواء محمد التميمي