جاسوس بورسعيد محمد عبدالباقي وخداعة للمخابرات المصرية

الجاسوس محمد عبدالباقي جاسوس بورسعيد

محمد عبد الباقي جاسوس بورسعيد من النماذج السيئة فى مجتمعنا المصري والعربي ولكن على العكس في بطلة من أبطال بوسعيد بنتشرف اننا بنذكرها وبنتكلم عنها وهي البطلة زينب الكفراوي الله يرحمها توفت من سنة تقريبا . ناس كتيرة ممكن ما تكونش تعرف زينب الكفراوي.

زينب الكفراوي دي ايقونة من ايقونات المقاومة الشعبية اللي في بورسعيد. لما كان عندها 15  سنة كانت بتقاوم مقاومة شرسة امام العدوان الثلاثي 1956م ساهمت في حاجات كتيرة قوي في نقل متفجرات في اختطاف ابن عم الملكة في حاجات كتيرة كانت بتساهم الحاجة زينب الكفراوي فيها .

وتم تكريمها من القيادة السياسية في مصر وبورسعيد ارض الرجالة. بورسعيد لما نتكلم عليها فعلا بمثل ملاحم كتيرة حصلت في ارضها سواء 1956م في 1967م  اثناء حرب الاستنزاف. في عام 1973 م هتلاقيهم كانوا رجالة بمعنى الكلمة.

ولكن بعد كده للاسف حرج منها واحد لا يمثل ابدا اهل بورسعيد وهو اراد باختياره ان هو يكون جاسوس بورسعيد بل مش كده وبس بل انه كان عاوز يتزاكى على اجهزة المخابرات. هو اسمه الجاسوس محمد علي الشهير بجاسوس بورسعيد.

نشأة وحياة جاسوس بورسعيد .

الجاسوس  محمد علي اللي اتولد وعاش في بورسعيد اتولد في عام 1974 م . اتولد من اسرة متوسطة الحال اسرة مصرية. اب وام وعندهم تلات بنات وولدين وهو واحد من الولدين. اخوه التاني كان اسمه خالد وكان اصغر منو 16 سنة والتلت بنات في منهم اتنين متجوزين.

ابوه عنده محل ادوات منزلية وهو كان في الثانوية العامة وجاب مجموعة ضعيف دخل المعهد الفني التجاري في السنة التانية معرفش ان هو يكمل .المهم خرج وبعد كده دخل الجيش لمدة سنتين من عام م1992 لغاية سنة 1994م وهو اصلا في الجيش كمل السنة بتاعة المعهد الفني التجاري واخد كمان المعهد الفني التجاري.

حياته لما تبص على حياته العائلية بيته كان في الحي الافرنجي ابوه كان عنده المحل وهو كان وهو صغير بيقعد مع ابوه وكان بيساعده وبيقف مع ابو في المحل. ما فيش الخلافات الاسرية والتفكك الاسري. ما فيش اي حاجة تحسسك ان هو طالع عنده مشكلة نفسية او مشكلة اجتماعية. المفروض ان هو طلع طبيعي جدا ما فيش اي مشكلة.بس هو البني ادم دايما هو اللي بيجري ورا الشيطان مش الشيطان هو اللي بيوزه عند بعض الناس.

بعد ما اخلص الجيش عايز يشتغل في المينا. وطبعا انتم عارفين شركات الشحن والتفريغ والجمارك وهكذا وقطاعات كتيرة جدا في بورسعيد شغالة في ميناء بورسعيد تبع الشحن وهكذا .وفي 2001م كان اتجوز من بنت عمه وكان جواز تقليدي جواز صالونات قعد سبع شهور بالظبط وراح مطلقها .

وراح متجوز بعدها واحدة تانية وفضلت الايام تمر وبيتنقل من شركة لشركة يقعد في الشركة دي اربع سنوات وبعد كده يروح في شركة تانية الا انه استقر كان في شركة الشركة ديي المفروض انها برضو بتاعة شحن وتفريغ واصبح مدير اداري في الشركة.

تجنيد جاسوس بورسعيد .

في عام 2011م تخيل البعض خلاص ما عدش فيه دولة والدنيا فوضى واللي عاوز يعمل حاجة يعملها وهو بقى في شهر اغسطس لسنة 2011م فكر ان انا ممكن اتعرف على الفيسبوك ببعض البنات. كتيرة جدا بيعملوا كده. المهم لقى واحدة وكان مكتوب اسمها بالعبري.

 راح عمل لها طلب اضافة راحت موافقة. وابتدا الكلام ياخد ويدي معها في الكلام وعارف انها من الكيان الصهيوني. الكلام ابتدى يدخل في السكة الشمال اللي انتم فاهمينها اللي هو اصلا بيدور عليه وهو متجوز. المهم هي قالت له ايه ؟ طب ما انا عندي بعض الناس التانيين اخليك كمان انت تتكلم معهم. وبقت بتبعت له اكونتات بتاع بنات تانية برضه في اسرائيل ويعمل لهم اضافة.

الموضوع بقى كبر راح عامل اكونت خاص بالعبري وبقى بيدخل ويتعرف على يهود وبقى بيبين لهم ان انا اه بحب اليهودية وبحب اسرائيل ونفسي ان انا وهم بيقولوا له طب ادخل كمان اليهودية ما فيش مشكلة انك انت تدخل وتتعهد ولقى موقع مكتوب كده عشرة مليون دولار.
انا مش بحكي لك على قصة طارق عبدالرازق .على فكرة انا بحكي لك على الجاسوس محمد علي عبدالباقي علشان في بعض التشابهات ما بينه وما بين الاحداث نوعا ما بتاع طارق عبدالرازق اللي كان في الصين.

محمد علي في اغسطس لما لقى الموقع دخل عليه بيشوف ايه موضوع عشرة مليون دولار. لقى ان هو موقع اسرائيلي بيتكلم على ان اللي هيدلي بمعلومات عن الجنود الاسرائيليين المختطفين في لبنان والمعلومات دي طبعا هتكون يعني معلومات اكيدة هيحصل على عشرة مليون دولار. 

دخل الموقع وسجل بقى بياناته وكتبلهم ان هو يعرف الجنود المخطوفين دول فين ومسجل اسمه ومسجل رقم تليفونه وكل بياناته.

مر اغسطس وفي شهر سبتمبر لقى التليفون بيرن. الو مين ؟ قال له انا بنيامين شاؤول ناديني باسم ابو منصور. انت قلت انك انت تعرف معلومات عن الجنود الاسرائيليين. قال له اه انا اعرف المعلومات عن الجنود الاسرائيليين. طب قول لينا تعرف ايه. انا اعرف ان هم هنا في مصر في مصر ؟.

 قال له اه انا اعرف ان هم هنا في مصر. قال له طب جبت منين بقى المعلومات وهم في مصر قال له ما انا بسمع الكلام وطراطيش كلام وطبعا الموضوع مش هيبقى معلن لكن انا عرفت يعني وانا مستعد ان انا اتعاون معكمقال له طب بص خد الرقم الكودي ده وراح مدي له رقم كودي وقال له خد رقم التليفون ده وقالوا لو طرأ اي ظرف او اي حاجة او اي معلومات ابقى كلمنا.

رجع بعدها بنيامين شاؤول راح متصل به بعدها بشهرين. طبعا كانت خلاص ما فيش حاجة. قال له ابتديت اتصلت بينا قال له ابدا ان انا عايز اتعاون ومعكم وعايز افضل معكم يعني يبقى في شغل وكده قال له طب بص تقدر انك انت تسافر فين؟

قال له بحكم ان انا كنت بشتغل او بشتغل في الميناء فانا سافرت قبل كده الصين وسافرت قبل كده تايلاند. فقال له طب ممكن تقابلني في الهند؟ قال له خلاص ولكن موضوع الهند تعذر فخلى الفيزا  لتايلاند. قال له خلاص تعال وقابلني في تايلاند. بس وانت جاي اهم حاجة تبقى مجهز بقى ورق تكتب لنا فيه كل حاجة عن اسمك وعن اهلك واخواتك والدك ووالدتك قرايبك. تجيب لينا كده ملخص عن معلوماتك حياتك.

وبالفعل راح برضو قابله في تايلاند في شهر مارس في عام 2012م طبعا سفارة تايلاند هي موجودة في تاور هناك في تايلاند وكان مقعدينه في فندق مش بعيد عن المكان ده. قعدوا طبعا يتكلموا معه ويشوفوا يجسه له نبضه ايه وابتدوا ان هم يدوا له تدريبات مش معقدة لان الطلبات بتاعته هي طلبات في متناول يده طلبات بالنسبة لمحمد علي مش هيبقى فيها مجهود.

انت بتشتغل في الميناء فاحنا عايزين نعرف مجموعة بقى من المعلومات. طبعا الميناء العسكري واماكن القطع العسكرية وياريت لو تنقل لنا عنها معلومات القطع العسكري اللي من الدول المختلفة اللي بتعدي تقول لنا عنها معلومات.

تجيب لنا معلومات كمان عن سفن الشحن وعن عمق المينا وعن الناس اللي بتشتغل في المينا وعن اسماء الجهات الامنية ومين من الجهات الامنية اللي بيشتغلوا في المينا والموظفين تجيب لنا كل المعلومات دي. دي معلومات خطيرة جدا عارف يعني ايه ميناء بورسعيد ويزرعوا جاسوس فيه ؟ هتبقي معلومات كبيرة جدا لان ميناء بورسعيد مجرى ملاحي دولي وحيوي جدا للدولة والجاسوس ده يعتبر جالهم على الطبطاب.

علي طول بعدها راح راجع على مصر وابتدى انه يجمع بعض المعلومات عن الاحداث اللي بتحصل في الميناء. وهو في هناك في تايلاند راحوا مديين له الفين دولار وقالوا له بص انت هتاخد معانا مرتب وعلى كل معلومات قوية ومهمة هتاخد مكافآت كبيرة مننا وطبعا بيغروه بالدولار والشغل اللي انتم فاهمينه وفهموه ان انت لازم نتقابل كل اربع خمس شهور واتفقوا ان يتقابلوا في شهر مايو.

هو لما رجع في مصر ابتدى يلم مجموعة من المعلومات ابتدى يحاول يعرف مجموعة من الناس يقوي علاقاته مع مجموعة من الناس مع انه ما يتوترش علاقته باي اشخاص عسكريين. هم قالوا له ما تعملش كده نهائيا. وكانت من الحاجات المهمة اللي مكلف بها ان اي شحن اسلحة يعرف بها يبلغ اي شحن مخدرات اتمسكت اسلحة اتمسكت الحاجات دي لازم انه يبلغهم بها على طول.

المفترض ان هم يتقابلوا في مايو اتأجلت الى شهر اغسطس في 2012م .جه شهر اغسطس مش عارف يلاقي اي تليفون ولا اي حاجة. يعمل ايه؟ يقوم متصل بسفارة اسرائيل اللي في قبرص. ويقول لهم يا جماعة انا اعرف ابو منصور ومحتاج ابو منصور ان هو يكلمني قال له طب خلاص احنا هنبقى نرد عليك بعد كده.

مر شهرين ولا حد بيتصل به خالص وراح متصل بيه ابو منصور. قال له انت ازاي تكلمني؟ وانت مين اللي قال لك انك انت تتصل؟ انا لما اعوزك انا اجيبك. لكن انا ما قلتلكش انك انت تتصل بالسفارة اللي هناك. ايه اللي انت بتعمله ده؟ المهم اتفقوا على ان هم يتقابلوا.

اتقابلوا في شهر نوفمبر 2012م في مانيلا في الفلبين وجايب معاه بقى ابو منصور واحد اسمه ديفيد مائير وقاعدين هما التلاتة مع بعض ابتدى بقى ديفيد مائير يحسنلو اكتر من التدريب وقالو بص المرة الجاية احنا حنديلك لاب توب وانطلبو منو بقى مجموعة من الطلبات طبعا كان في مسميات اه اكواد سرية. الاسلحة مثلا بتتسمى بزيت الزيتون. ما اعرفش كل حاجة لها اسم. وقالوا له عايزينك تركز كمان على السفن اللي معدية الخاصة بسوريا وبايران جدا جدا. تجيب لنا كل المعلومات عن كل الحاويات اللي بتعدي. كل الحاويات كل السفن كل السف الشحن الامور دي كلها لازم تجيب لنا معلومات عنها.

وهو كان جايب معه بقى وهو مقابلهم تقرير بكل الطلبات اللي كانوا طالبينها عن الميناء بالعاملين. بل قالوا له انك انت تجند لنا مزيد من الناس جوة الميناء. وعلى كل واحد هتجنده هتاخد مكافأة ضخمة جدا طبعا ده بالنسبة له يسيل اليه اللعاب وفي كل اجازة كانوا بيروح لهم سواء في تايلاند في مانيلا كانوا بيوزعوا عليه بنات وهم عارفين يعرفوا ايه اللي بيزرعوا ازاي وبرضو راح واخد منهم 3500 دولار ورجع لمصر.

مناورة جاسوس بورسعيد مع المخابرات المصرية .

لما رجع من مصر بقى الافندي عايز يستذكي عايز يستنصح وهقولك ليه من الاخر خد بعضه وراح رايح على مقر تبع سلاح حرس الحدود وقالهم حصل واحد اتنين تلاتة وراحو بعتينوا على المخابرات الحربية فا المخابرات الحربية قلهم الكلام ده  من كلامه زي ما يكون ما ادولوش اهتمام كافي فراح على المخابرات العامة.

المخابرات العامة لما راح عليهم وبلغهم وقال لهم قالوا له خلاص انت المفروض اهو بتصفي نيتك وانك انت بتعلن قدامهم ان انت يا سيدي خلاص بتوب وانك انت عايز تعمل الصح.

المخابرات العامة قالت له اياك انك انت تتعامل معهم الا بتوجيهاتنا احنا. ما تدنوش اكتر من كده. يعني لا يعمل اتصال ولا يعمل اي حاجة غير لما المخابرات العامة هي اللي توجهه. لكن الافندي فاكر نفسه ان هو انصح من اجهزة المخابرات. هو بقى كان بيجس النبض بس. عايز يشوف رد فعلهم ويطمن.

وهو فاكر ان هو ناصح كانوا الموساد مكلفه انه المفترض يتعامل مع بعض الجهات الامنية زي حزب الله زي من غزة زي من سوريا. فهو بالايميل ابتدى يراسل المجموعات دي ويقول لهم ان انا هنا في مصر في ميناء بورسعيد وممكن اساعدكم ان اي حاجات خاصة باسرائيل ابعتها لكم واساعدكم.

فابتدى ان يفتكر نفسه عميل مزدوج. كان حصل ان فيه شحنات تم القبض عليها في الميناء بورسعيد راح مخاطب ابو منصور وبعت له ايميل وقال له واحد اتنين تلاتة وقله ان انا حاسس ان الاجهزة الامنية المصرية عينها عليا.

القبض على جاسوس بورسعيد .

طبعا ما ما حدش هيسمي عليه. المخابرات المصرية كانت رصداه وتم القبض عليه وتم تحريز كل الحاجات اللي كان بيستخدمها من التليفونات من المكالمات اللي كان بيعملها والايميلات المرسلة والمستقبلة تايلاند

تصريحات جاسوس بورسعيد .

عشان الشغل بتاعي لان الشركة بتاعتنا ديا موجود في تايلاند وعرفت ان انا رجعت في شهر تلاتة وما خدتش تلات ايام او جت في اتصالات الحربية كلمتهم وبعثت  قلت لهم اعمل ايه وكل حاجة عملتها كانت وكتبات كتيرة بينه وبين ده كل ضباطها التلاتة القدام واللي اتغيروا واللي موجودين. فضلت ماشي معهم وما ضرتش بلدي في حاجة انا ما كنتش حاسس ان انا بعمل حاجة لبلدي. وبعدين في شهر واحد توجهت للمخابرات العامة وشرحت لهم كل حاجة.

محاكمة جاسوس بورسعيد .

وتم الحكم عليه في عام 2014م بعشر سنوات سجن. تقريبا العشر سنوات يعني والله اعلم ان اللي هم عشر سنوات بس لانه حاول ان هو يتعاون ولكن برضه لعب بديله. واما الاتنين التانيين اللي هم تبع المخابرات اتحكم عليهم بالاشغال ولكن حكم غيابي. والاحداث دي قدام حضراتكم في عام 2014م لغاية دلوقتي بتأكد لنا دولة الكيان الصهيوني ان السلام اللي هم بيزعموه مجرد ابتسامات زائفة مجرد حبر على ورق. اتمنى ان المعلومات البسيطة والقصة الواقعية تكون نالت اعجاب حضراتكم ونتعلم منها.